Текст: Псалм 1
ВРАБЕЦОТ И КАНАРИНКАТА
„Затоа, излезете од нивната средина и одделете се, вели Господ“. 2 Коринт. 6:17.
Не постои човек кој може да им служи истовремено на двајца господари. Ако сме толерантни кон гревот, тогаш нема ние да го обратиме светот, туку светот ќе нè обрати нас. Некоја христијанка многу се трудела да го донесе својот маж в црква. Тој ì рекол дека ќе оди со неа в црква само под еден услов, ако и таа се согласи да оди со него во кафеана. Очајна, таа му се обратила на пасторот: „Што да правам? Дали жената треба да го слуша мажот во сè?“ Дали нејзината добра намера ја оправдува нејзината постапка?
Одговорот на овие прашања се наоѓа во следниот пример. Некој човек имал канаринка што пеела многу убаво. Неговиот сосед чувал едно врапче. Сакајќи да видат дали канаринката ќе го научи врапчето да пее како неа, ги ставиле во иста соба. Но, наместо врапчето да научи да пее како канаринката, канаринката почнала да црцори како врапчето!
Се разбира дека во својот секојдневен живот не можеш да се одделиш од неверниот свет. Неминовно е да контактираш со нив, но сепак не треба да ги вршиш нивните дела. Една стара кинеска поговорка вели: „Не можеш да ги сопреш птиците да летаат над твојата глава, но можеш да не им дозволиш да направат гнездо во твојата коса“.
Во таа смисла Господ вели: „одделете се!“
„Се одлучив јас, по Исус одам (хЗ)
и назад не се обраќам!
Пред мене Исус, зад мене светот (хЗ)
и назад не се обраќам!“ (ХП–196)
„ЛУЃЕТО КОИ ГО ПРЕВРТЕА СВЕТОТ,
БЕА ЛУЃЕ КОИ СВЕТОТ НЕ МОЖЕШЕ ДА ГИ ПРЕВРТИ!“