Текст: 1 Коринт 12:14–20
КОРИСТИ ГИ СВОИТЕ ДАРБИ!
„Издигајќи се на височина... им даде дарови на луѓето“. Ефес. 4:8.
Христијаните понекогаш не ги користат своите дарби и способности во заедницата, бидејќи мислат дека нема многу да придонесат со тоа. Можеби, чувствуваат дека нивната дарба е многу мала во споредба со способноста на другите верници. Или, можеби, се чувствуваат неспособни поради некои неуспеси во минатото. Или, пак, си мислат дека се спречени од околностите што не можат да ги изменат. Но, Господ ја дал таа дарба и верникот може да биде сигурен дека, ако има цврста волја да ја исползува, Господ ќе дејствува преку него да им донесе благодат на другите.
За време на Првата светска војна, еден млад и многу талентиран пијанист бил регрутиран и испратен на фронтот. Во жестоките борби бил тешко ранет и десната рака му била ампутирана. Иако тоа било страшен удар за еден музичар, младиот човек сепак решил да продолжи да се занимава со музика. По заздравувањето, одел од композитор до композитор и молел да напишат некое дело за свирење само со левата рака. Ниеден композитор не се нафатил, освен големиот француски композитор Морис Равел, познат по своето „Болеро“. Тој одговорил на молбата на младиот уметник и го напишал прекрасниот „Концерт во D-дур за левата рака“. Публиката со одушевување ја примила изведбата на оваа прекрасна музика во исполнение на едноракиот пијанист.
Без оглед на твоите ограничувања, Бог има замисла што е најсоодветна за тебе. Затоа, нека ти биде пример храбриот музичар и не дозволувај ограничувањата да те запрат. Измери ги реално своите способности и дарби и вклучи се во работа што Бог ја определил токму за тебе!
„Ќе Ти служам, од љубов, Боже,
Ти ми даде живот нов;
Јас бев ништо, пред да ме најдеш,
Ти ми даде живот нов!“ (ХП–200)
„ПОДГОТВИ СИ ГИ АЛАТКИТЕ,
А БОГ ЌЕ ТИ ДАДЕ РАБОТА!“