Текст: Изреки Соломонови 28:12–20
НАЈГОЛЕМ ПРОПОВЕДНИК
„...а од слугите понатаму се бара секој од нив да се покаже верен“. 1 Кор. 4:2.
Еден проповедник ја завршил својата проповед со повик – секој што е поттикнат, да излезе напред. Излегла една богата жена и замолила да каже нешто: „Сакам да знаете – почнала да зборува таа – зошто вечерва излегов напред. Не е поради проповедта што ја слушнавме вечерва од проповедникот; туку поради сведоштвото на оваа жена што седи овде пред мене. Нејзините раце се испукани од работа, долгите години на напорна работа ја згрбавиле; таа е сиромашна жена, која со години работеше кај мене како перачка. Но, никогаш не сум ја видела да биде избувлива, да каже некој непристоен збор или да направи некое нечесно дело. Нејзиниот живот го красат безброј мали нешта на несебична љубов. Но, ќе го кажам и ова, макар со срам – дека јас отворено се исмевав на нејзината вера и верност кон Бог. Сепак, кога неодамна умре мојата малечка ќерка, оваа жена ми помогна да гледам зад гробот и да ја пролеам мојата прва солза на надеж. Неодоливиот магнетизам на нејзиниот живот ме доведе до Христос“.
Проповедникот ја повикал таа жена да излезе напред. Таа излегла со солзи радосници во очите и со лице од кое блескала Небесната светлина. Пасторот рекол: „Браќа и сестри, да ви го претставам најголемиот проповедник оваа вечер“. Многу од вас што ќе го читате ова, сте како оваа обична жена. Можеби не вршиш некоја „важна“ служба во црквата, но ако сведочиш за Господ онаму каде што си, еден ден ќе биде наградена твојата верност. Колку прекрасно ќе биде кога Господ ќе ти рече: „Целиот твој живот беше една проповед; добар и верен слуго, влези во радоста на твојот Господ“.
„Свет да сум јас сакам, свет во секој час,
да го славам Исус вечно сакам јас.
Чист да сум во срце, чист во душата
верен да сум везден, верен секој ден! (ХП–190)
„ЖИВИОТ БОГ ВО ЖИВИОТ ХРИСТИЈАНИН
Е ЖИВА ПРОПОВЕД!“