Текст: Колос. 2:1–7
ЗЛАТЕН РУДНИК
„Во Кого се сокриени сите сокровишта на премудроста и познавањето“. Колос. 2:3.
Библијата е рудник на богатство, но тоа не се наоѓа само на површината. Повеќето од богатството може да се најде, ако се копа подлабоко. Колку подлабоко копаш, толку поголеми скапоцени камења наоѓаш. Каква трагедија е кога човек гради куќа на ваков златен рудник, и не знаејќи за него продолжува да живее во беда и сиромаштија. Не постои потреба во човековото срце која не може да биде исполнета од Бог, бидејќи „во него се скриени сите сокровишта на премудроста и познавањето“.
Некоја стара жена живеела во голема сиромаштија. Еден нејзин пријател, чул за нејзината сиромаштија и дошол да ја посети. Жената, покрај другото, се пожалила и на својот син, кој, иако подолго време живеел во Австралија, не ì праќал никаква помош. „Редовно ми пишува, продолжила старицата, и во секое писмо ми праќа по некоја шарена разгледница“. Пријателот побарал да ги види писмата и разгледниците и на се изненадил кога открил дека тоа не биле никакви разгледници, туку банкноти од 100 австралиски долари! Кутрата старица не ја сфатила вистинската вредност на тие „разгледници“. Живеела во сиромаштија, иако можела да живее многу подобро.
Се смееме на ова, но зар не е така со некои верници кои живеат како бескуќници, наместо како царски синови? Многу ветувања ни дал нашиот небесен Татко, но, како старицата, и ние сме ги виделе убавите „разгледници“, не сфаќајќи ја нивната вистинска вредност.
„Јас доаѓам без богатство
и во духовно сум слепило,
а во Тебе се наоѓам,
о, Јагне Божјо, доаѓам!“ (ХП–135)
„БИБЛИЈАТА Е ПРОЗОРЕЦ ОД ЗАТВОРОТ НА НАДЕЖТА, НИЗ КОЈ ГЛЕДАМЕ ВО ВЕЧНОСТА“.